Ենս Սթոլթենբերգը հանդես է գալիս ՆԱՏՕ-ի գործընկեր երկրներում զորավարժությունների և հնարավորությունների ամրապնդման նախաձեռնությամբ
Ենս Սթոլթենբերգը հանդես է գալիս ՆԱՏՕ-ի գործընկեր երկրներում զորավարժությունների և հնարավորությունների ամրապնդման նախաձեռնությամբ: Այս մասին հայտարարությունը, Հյուսիսատլանտյան դաշինքի գլխավոր քարտուղարն արել է այսօր, Բրյուսելում կայացած մամուլի ասուլիսում, որում նա խոսել է փետրվարի 17-18-ին նախատեսված, պաշտպանության նախարարների հանդիպմանը քննարկվելիք հարցերի մասին:
Ըստ Սթոլթենբերգի, առաջին հարցերից մեկը, որը նա կքննարկի պաշտպանության նախարարների հետ, կլինի ՆԱՏՕ-ի ապագա զարգացման ռազմավարությունը՝ «ՆԱՏՕ 2030»: Նրա խոսքով, այս ռազմավարության նպատակը անդրատլանտյան կապի ամրապնդումն է: Այդ նպատակով Սթոլթենբերգը մտադիր է ներկայացնել մի քանի նախաձեռնություններ:
Դրանցից մեկը ՆԱՏՕ-ի գործընկեր երկրներում վերապատրաստման և կարողությունների ուժեղացումն է:
«Քանի որ կանխարգելումն ավելի լավ է, քան միջամտությունը», – ասել է նա:
Ըստ նրա, գործընկերների հետ խորհրդատվությունների խորացումը հատկապես կարևոր է, երբ դաշինքը ստիպված է գործ ունենալ ավելի ուժեղ՝ Չինաստանի և ագրեսիվ Ռուսաստանի հետ:
Ենս Սթոլթենբերգի խոսքով, պաշտպանության նախարարների հանդիպմանը, նա մտադիր է նաև առաջարկ ներկայացնել ՆԱՏՕ-ի զսպման ու պաշտպանական գործունեության ֆինանսավորումը մեծացնելու մասին:
«Դա կնպաստի մեր ուժերի ու մարտական ստորաբաժանումների տեղակայմանը Դաշինքի արևելյան թևում: Այդ թվում ՝ օդային պարեկությունը, ռազմածովային տեղակայումները և զորավարժությունները: Այդ նպատակով միասին ավելի շատ գումար ծախսելը ընդգծում է Դաշինքի անդամների նվիրվածությունը ՆԱՏՕ-ի 5-րդ հոդվածին, որը ենթադրում է հավաքական պաշտպանություն: Միևնույն ժամանակ, դա կօգնի կիսել ֆինանսական բեռը», – հայտարարել է Սթոլթենբերգը:
Ըստ ՆԱՏՕ-ի գլխավոր քարտուղարի, նա հանդես կգա նախաձեռնությամբ, որպեսզի ՆԱՏՕ-ի անդամները հաստատեն ավելի հստակ սահմանված կայունության ազգային ծրագիր:
«Ամեն տարի մենք կգնահատենք դաշինքի անդամ երկրներում կարևոր ենթակառուցվածքների և տեխնոլոգիաների պաշտպանությունը, ներառյալ օտարերկրյա պետությունների ազդեցությունը», – ասել է Սթոլթենբերգը:
Ենս Սթոլթենբերգը նաև կոչ է անում ավելացնել ՆԱՏՕ-ի անդամ պետությունների քաղաքական համակարգումը և քննարկումներ անցկացնել տնտեսական հարցերի շուրջ, որոնք կապված են անվտանգության հետ:
ՆԱՏՕ-ի գլխավոր քարտուղարը, Ռուսաստանը և Չինաստանը անվանեց Դաշինքի առջև ծառացած հիմնական համաշխարհային մարտահրավերները: Նրա խոսքով ՝ Չինաստանը և Ռուսաստանը «կանոնների վրա հիմնված միջազգային համակարգում ավտորիտար դիմադրության առաջապահ դիրքում են»:
«Ուստի ՆԱՏՕ-ն պետք է խորացնի քաղաքական երկխոսությունն ու գործնական համագործակցությունը համախոհ գործընկերների հետ, մեր արժեքներն ու շահերը առաջ տանելու համար»,- ասել է Սթոլթենբերգը:
Ըստ Ստոլտենբերգի, ՆԱՏՕ-ի պաշտպանության նախարարների հանդիպմանը քննարկվելու է նաև Աֆղանստանում և Իրաքում ՆԱՏՕ-ի առաքելության ապագան: Խոսելով Աֆղանստանի մասին ՝ ՆԱՏՕ-ի գլխավոր քարտուղարն ասել է, որ Աֆղանստանում բռնությունները շարունակվում են, ինչը անընդունելի է:
««Թալիբանը» պետք է նվազեցնի բռնությունները, բարեխղճորեն բանակցություններ վարի և կատարի այն պայմանը, որ շարժումը դադարեցնի համագործակցությունը միջազգային ահաբեկչական խմբավորումների հետ»,- ասել է Սթոլթենբերգը:
Ինչ վերաբերում է Իրաքում ՆԱՏՕ-ի առաքելությանը, գլխավոր քարտուղարը ակնկալում է, որ այս առաքելությունն կընդլայնվի:
Մեկ այլ հարց, որը պաշտպանության նախարարները կքննարկեն, կլինի ֆինանսական բեռի բաշխումը, ինչը նշանակում է պաշտպանական ծախսերի ավելացում:
«Ինչպես սպասվում էր, ՆԱՏՕ-ի իննը անդամներ իրենց ՀՆԱ-ի 2%-ը կծախսեն պաշտպանության վրա, իսկ 24 անդամներ իրենց ներդրումների 20%-ը կծախսեն սարքավորումների վրա», – հայտարարել է դաշինքի գլխավոր քարտուղարը: