Վախտանգ Գոմելաուրին պարզաբանել է, թե չնայած փակված սահմաններին, որ դեպքում կարող են Ռուսաստանի քաղաքացիները մուտք գործել Վրաստան
Վախտանգ Գոմելաուրին պարզաբանել է, թե չնայած փակված սահմաններին, որ դեպքում կարող են Ռուսաստանի քաղաքացիները մուտք գործել Վրաստան

Ներքին գործերի նախարար Վախտանգ Գոմելաուրին պարզաբանել է, թե չնայած փակված սահմաններին, որ դեպքում կարող են Ռուսաստանի քաղաքացիները մուտք գործել Վրաստան:

«Ցանկանում եմ ուշադրությունը բևեռել վերջին ժամանակներում տարածվող լուրերի վրա: Սոցիալական ցանցերում և մամուլում տարածվել է լրատվություն, իբր սահմանները բաց են: Շեշտը դրվել էր Ռուսաստանի վրա, որ Ռուսաստանի քաղաքացիները իրենց մեքենաներով մուտք են գործում Վրաստան: Ես ուզում եմ տեղեկացնել մեր քաղաքացիներին, որ Վրաստանի սահմանները փակ են բոլոր ուղղություններով, ինչպես մեր հարևան երկրների, այնպես էլ Ռուսաստանի հետ: Սահմանը բացվում է միայն այն դեպքում, եթե երկիր է մուտք գործում մեր քաղաքացին: Երկիր մտնելուց հետո նրանք անցնում են 14 օրյա կարանտին: Դրանք հիմնականում երկքաղաքացիություն ունեցող անձիք են: Ինչպես գիտեք Վրաստանի բազմաթիվ քաղաքացիներ ունեն նաև Ռուսաստանի քաղաքացիություն: Մենք իրավունք չունենք նրանց արգելել մուտք գործել երկիր: Հաճախ կան նաև դեպքեր, երբ ընտանիքի անդամներից մեկը Վրաստանի քաղաքացի է, իսկ մյուսը ոչ, մենք չենք կարող նրանց արգելել մուտք գործել Վրաստան: Օրինակ, եթե ծնողներն ունեն երկքաղաքացիություն, իսկ երեխան ոչ, մենք չենք կարող երեխային ետ ուղարկել»,- ասել է Գոմելաուրին:

Ըստ նրա, Վրաստանում կան նաև Ռուսաստանի քաղաքացիներ, ովքեր մինչ համավարակի տարածումը մնացել են Վրաստանում: