Շալվա Պապուաշվիլին հանդիպել է Գերմանիայի Բունդեսթագի կրթության կոմիտեի նախագահի հետ
Գերմանիա այցով գտնվող Վրաստանի խորհրդարանի կրթության եւ գիտության կոմիտեի նախագահ Շալվա Պապուաշվիլին հանդիպեց Բունդեսթագի կրթության կոմիտեի նախագահ Էռնստ Դիտեր Ռոսմանի հետ:
Ինչպես հայտնում է Վրաստանի խորհրդարանի մամուլի ծառայությունը, կողմերը քննարկել են երկու երկրների միջեւ առկա բարեկամական և գործընկերային հարաբերությունները և ապագա համագործակցության ձևաչափը: Այս համատեքստում ընդգծվեց կրթության և գիտության ոլորտում սերտ համագործակցության կարևորությունը:
Շալվա Պապուաշվիլին շնորհակալություն հայտնեց իր գերմանացի գործընկերոջը այն աջակցության համար, որը Գերմանիան ցուցաբերում է Վրաստանում մասնագիտական կրթության համակարգի զարգացմանը: Ուշադրության կենտրոնում էին գլոբալ համաճարակը, դրա ազդեցությունը կրթական համակարգի վրա և հետևանքների հաղթահարման մեջ փորձի փոխանակման կարևորությունը:
«Կրթության և գիտության կոմիտեն սկսում է թեմատիկ ուսումնասիրություն համաճարակի ազդեցության մասին հանրակրթության հասանելիության և որակի վրա: Այս առումով հետաքրքիր էր գերմանացի գործընկերոջից տեղեկություններ ստանալ իրենց փորձի մասին», – հանդիպումից հետո ասաց Շալվա Պապուաշվիլին: