Վրաստանի նախագահ Սալոմե Զուրաբիշվիլին զրուցել է Հռոմի պապ Ֆրանցիսկոսի հետ:
Վրաստանի նախագահի մամուլի ծառայության փոխանցմամբ, զրույցի ընթացքում կարևորվել է միջազգային համերաշխությունը՝ կորոնավիրուսի ճգնաժամի ընթացքում: Վրաստանի նախագահը Հռոմի պապին փոխանցել է Համայն Վրաստանի կաթողիկոս պատրիարքի ջերմագին ողջյունները և նշել, որ այսօր կաթողիկոս պատրիարքի հետ հանդիպման ընթացքում խոսել է միջազգային համերաշխության կարևորության մասին:
Զրույցի ժամանակ անդրադարձ է նաև կատարվել շրջակա միջավայրի համաշխարհային իրավիճակի և բնապահպանական խնդիրների վրա, ինչը Հռոմի Պապի հիմնական առաջնահերթություններից մեկն է:
Նախագահի խոսքով, Վրաստանի համար շատ կարևոր է պաշտպանել շրջակա միջավայրը և հոգ տանել երկրի էկոհամակարգերին: Հռոմի պապը շեշտել է, որ ինքը բնապահպանական հարցերում Վրաստանին ցուցաբերում է ամբողջությամբ աջակցություն:
Վրաստանի նախագահը Հռոմի պապի հետ խոսել է Վրաստանի բռնազավթված տարածքների և այնտեղ տիրող հումանիտար ճգնաժամի վերաբերյալ: Հռոմի պապը նշել է, որ ճգնաժամի ընթացքում ավելի պարզ է դարձել, թե որքան մեծ է ազգերի միջև եղբայրության անհրաժեշտությունը:
Մայիսի 14-ին Հռոմի պապը աղոթք է բարձրացնելու համաճարակից երկրագնդի փրկության համար: Նա Վրաստանի նախագահին խոստացել է, որ աղոթելու է Վրաստանի՝ որպես մեծահոգությամբ օժտված և իր համար թանկագին ժողովրդի համար:
Հեղինակ՝ Անժելլա Սարոյան