Վրաստանի նախագահ Սալոմե Զուրաբիշվիլին Օրբելիանների պալատում հյուրընկալել է անօրեն բանտարկությունից ազատված բժիշկ Վաժա Գափրինդաշվիլիին և նրա ընտանիքին և անձամբ շնորհավորել նրան ազատ արձակման կապակցությամբ:
Ըստ Վրաստանի նախագահի մամուլի ծառայության, Սալոմե Զուրաբիշվիլին շնորհավորել է բժշկին և նրա ընտանիքին գալիք նոր տարվա առթիվ և մաղթել հաջողություններ մասնագիտական գործունեության մեջ:
«Հասարակությունը անհամբերությամբ սպասում էր ձեր բանտից ազատմանը: Այս փաստը հույս է ներշնչել ապագայի համար»,- ասել է Վրաստանի նախագահը:
Հանդիպմանը նախագահն ընդգծել է միջազգային հանրության ներգրավվածության կարևորությունը և շնորհակալություն հայտնել բոլոր նրանց, ովքեր իրենց ներդրումն են ունեցել բժիշկ Վաժա Գափրինդաշվիլին ազատելու գործում:
Բժիշկ Վաժա Գափրինդաշվիլին, որը 49 օր անօրինական բանտարկության մեջ էր բռնազավթիչ ռեժիմի կողմից, ազատ է արձակվել դեկտեմբերի 28-ին: