Պատրաստ ենք 2024 թվականին հայտ ներկայացնենք Եվրամիությանը անդամակցելու համար. Դավիթ Զալկալիանի
Պատրաստ ենք 2024 թվականին հայտ ներկայացնենք Եվրամիությանը անդամակցելու համար. Դավիթ Զալկալիանի

Վրաստանի արտաքին գործերի նախարար Դավիթ Զալկալիանին «Իմեդի» ռադիոկայանի եթերում խոսել է Եվրամիությանը Վրաստանի անդամակցության հեռանկարների մասին:

Նախարարի խոսքով, ներկայիս իշխանությունները պատասխանատու են և Եվրամիության անդամակցելու հայտը 2024 թվականին ներկայացնելու մասին ծրագիրը համաձայնեցվել է Եվրոպական գործընկերների հետ:

«Դա չպետք է լինի դատարկ կրակոց, այնպիսի հայտարարություն, որը ոչինչ չի բերի և այդ ժամանակ դուք ստիպված կլինեք պատասխանել, ինչին ականատես ենք եղել նախորդ կառավարության օրոք: Այցեգրերի ազատականացման վերաբերյալ հայտարարություններ են եղել, որ այսօր կլինի, վաղը կլինի, սակայն մինչև 2012 թվականը մենք այցեգրերի ազատականացման առումով շոշափելի արդյունք չենք ունեցել: Արդյունքը եղավ ներկայիս իշխանությունների օրոք, այդ թվում խորը և համապարփակ ազատ առևտրի համաձայնագիրը և ասոցացման համաձայնագիրը: Մենք շատ ենք աշխատել այս հայտարարությանը հասնելու համար, որ պատրաստ ենք 2024 թվականին դիմել Եվրամիությանը անդամակցելու հայտով: Սա շատ լուրջ աշխատանքային գործընթաց է, որն ընթանում է այս տարիների ընթացքում»,- հայտարարել է Դավիթ Զալկալիանին:

Զալկալիանին նշել է, որ ասոցացման համաձայնագրի հաջող իրականացումը, այցեգրերի ազատականացման հաջող իրականացումը, ազատ առևտրի համաձայնագիրը, որը թույլ է տալիս արդիականացնել Վրաստանի տնտեսությունը, ներդաշնակեցնելով օրենսդրությունը երկիրը հասցրել է այն կետի, երբ Վրաստանի եվրոպականացման գործընթացը դառնում է անշրջելի:

«Հենց դրա արդյունքում ենք արել այս հայտարարությունը: Ժամանակը շատ ճշգրիտ է ընտրված և ես համոզված եմ, որ այս դիմումը մենք կկատարենք 2024 թվականին»,- հավելել է նախարարը:

Զալկալիանին անդրադարձել է նաև արևելյան գործընկերության ձևաչափում համագործակցության հարցին: Նրա խոսքով, «արևելյան գործընկերության» 10-ամյակին նվիրված կոնֆերանսին, որը անցյալ տարի անց է կացվել Վրաստանում և աչքի է ընկել աննախադեպ մասշտաբներով և հյուրերի բարձր մակարդակով, գործընկերները միաձայն նշել են, որ Վրաստանը առաջատարն է «արևելյան գործընկերության» անդամ երկրների միջև և երկիր է, որը կատարում է ասոցացման համաձայնագիրը:

«Մենք այն ժամանակ հայտարարել ենք, որ ունենք հավակնոտ ծրագրեր, որ մենք ցանկանում ենք էլ ավելի ինտեգրում, ֆիզիկական ինտեգրում Սևծովյան բաղադրիչի նախատեսմամբ, ինչը նշանակում է Վրաստանի ավելի ներգրավում Եվրամիության ծրագրերում և գործակալություններում, Եվրամիության տրանսպորտային և ենթակառուցվածքային նախագծերում, Վրաստանի ավելի շատ ներգրավում էներգետիկ նախագծերում, ներգրավվածություն կրթության տեսանկյունից»,- նշել է Դավիթ Զալկալիանին:

Տեղեկատվությունը տարածում է Վրաստանի արտաքին գործերի նախարարության մամուլի ծառայությունը:

Թողնել մեկնաբանություն