Լիտվացի խորհրդարանականների խումբը Վրաստանի օկուպացված գոտու երկայնքով փշալարերի և արհեստական պատնեշների տեղադրման առնչությամբ հանդես է եկել Վրաստանին աջակցող հայտարարությամբ և Ռուսաստանի Դաշնությանը կոչ արել, դադարեցնել անօրեն գործողությունները Վրաստանի դեմ:

Սեյմի անդամների 13 հոգուց բաղկացած խումբը մեկ անգամ ևս կայուն աջակցություն է հայտնում Վրաստանի ինքնիշխանությանը և տարածքային ամբողջականությանը՝ դրա միջազգայնորեն ճանաչված սահմաններում և կոչ անում Ռուսաստանի Դաշնությանը, պաշտպանել միջազգային իրավունքի նորմերը, դադարեցնել անօրեն գործողությունները Վրաստանի և այս երկրի քաղաքացիների դեմ և կատարել ստանձնած միջազգային պարտականությունները:

Տիրող իրավիճակին է արձագանքել նաև Լիտվայի սեյմի անդամ, Վրաստանի հետ բարեկամության խմբի ղեկավար Ժիգիմանտաս Պավիլյոնիսը:

«Լիտվան մշտապես եղել է Վրաստանի հիմնական դաշնակիցը արևմուտքում: 11 տարի առաջ օգոստոսին, երբ Ռուսաստանը ներխուժեց Վրաստանի տարածք, մենք միակն էինք, որոնք փորձեցինք Եվրամիության և ՆԱՏՕ-ի երկրներին համոզել, Վրաստանին չթողնել մենակ, ցավոք, այն ժամանակ, արևմուտքը չլսեց մեր ձայնը և ուշ արձագանքեց – միայն Ուկրաինայի բռնազավթումից հետո: Անթույլատրելի է, Ռուսաստանին թույլ տանք շարունակել սադրանքները մեր դաշնակիցների նկատմամբ: Բոլորս պարտավոր ենք, արձագանքել Վրաստանում իրավիճակի ապակայունացման փորձերին: Չեմ կասկածում, որ այս հարցը կքննարկվի Վրաստանի նախագահ Սալոմե Զուրաբիշվիլու Լիտվա կատարվելիք այցի ժամանակ, երբ նա կմասնակցի նախագահ Վալդա Ադամկուսի անվան երրորդ կոնֆերանսին», նշել է Պավիլյոնիսը:

Հայտարարությունը հրապարակվել է Լիտվայի սեյմի պաշտոնական կայքէջում: