Հայաստանի վարչապետ Նիկոլ Փաշինյանը հայտարարել է, որ Ադրբեջանը ռազմական գործողությունները կդադարեցնի միայն այն դեպքում, եթե Լեռնային Ղարաբաղի հարցում փոխվի Թուրքիայի դիրքորոշումը: Այս մասին Նիկոլ Փաշինյանը հայտարարել է «ռոյթերսի» հետ զրույցում:

«Համոզված եմ, որ քանի դեռ Թուրքիայի դիրքորոշումը չի փոխվել, Ադրբեջանը չի դադարեցնելու ռազմական գործողությունները»,- ասել է Փաշինյանը:

Հայաստանի վարչապետի խոսքով, մինչ մոսկովյան բանակցությունները, Թուրքիան հրապարակայնորեն հայտարարել էր, որ իր կարծիքով, Ադրբեջանը պետք է շարունակի ռազմական գործողությունները:

Բացի այդ, Փաշինյանի հայտարարությամբ, Մոսկվայում ձեռք բերված հրադադարից հետո, Թուրքիայի արտաքին գործերի նախարարը իր ադրբեջանցի գործընկերոջ հետ ունեցել է հեռախոսազրույց: Հայաստանի վարչապետի պնդմամբ, հեռախոսազրույցի նպատակը հրահանգ էր, որ Ադրբեջանը չդադարեցներ ռազմական գործողությունները:

«Թուրքիան Հարավային Կովկաս է եկել՝ շարունակելու իր այն քաղաքականությունը, որը նա վարում է Միջերկրական ծովում, Հունաստանի և Կիպրոսի նկատմամբ, կամ Լիբիայում, Սիրիայում և Իրաքում: Դա էքսպանսիոնիստական քաղաքականություն է»,- հայտարարել է Նիկոլ Փաշինյանը:

Նրա խոսքով, «հիմնախնդիրն նրանում է, որ Հարավային Կովկասում հայերը վերջին մնացած խոչընդոտն են այդ էքսպանսիայի ճանապարհին»:

«Ողջ Հարավային Կովկասը կդառնա Սիրիա: Այս կրակը շատ արագ կտարածվի դեպի հյուսիս և դեպի հարավ»,- ասել է նա: