Ադրբեջանի նախագահ Իլհամ Ալիևն հայտարարում է, որ երեք երկրների առաջնորդների միջև ձևակերպված համաձայնագրի կետերից մեկը, ներկայացնում է Լեռնային Ղարաբաղում Ռուսաստանի և Թուրքիայի համատեղ խաղաղապահ առաքելություն: Այս մասին տեղեկությունը տարածում են ադրբեջանական լրատվամիջոցները:

Լրատվամիջոցների հաղորդմամբ, Ալիևը Լեռնային Ղարաբաղում ռազմական գործողությունների ավարտից հետո ռուսական և թուրքական խաղաղապահ առաքելության տեղակայման մասին խոսել է Ռուսաստանի Դաշնության նախագահի հետ տեսակոնֆերանսի ժամանակ:

«Այն փաստը, որ երեք երկրների ղեկավարներն այսօր ստորագրել են այս փաստաթուղթը, ցույց է տալիս Ռուսաստանի Դաշնության հատուկ դերը այս հակամարտության կարգավորման գործընթացում: Համոզված եմ, որ Ռուսաստանի Դաշնության դերը տարածաշրջանում հետագա գործողություններում, ներառյալ հակամարտության արդյունքների լուծման և Ադրբեջան-Հայաստան հարաբերությունների նորմալացման հարցում կարևոր է լինելու: Ես կցանկանայի նաև շնորհակալություն հայտնել Թուրքիայի նախագահ Ռեջեփ Թայիփ Էրդողանին, հակամարտության կարգավորման գործընթացում ունեցած դերի համար: Այսօրվա համաձայնագրի կետերից մեկը ներկայացնում է Լեռնային Ղարաբաղում Ռուսաստանի և Թուրքիայի համատեղ խաղաղապահ առաքելություն: Այսպիսով, մենք տարածաշրջանում փոխգործակցության նոր ձևաչափ ենք ստեղծում, ոչ միայն հակամարտության կարգավորման, այլ նաև հետագա զարգացման համար, քանի որ համաձայնագրի կետերից մեկը ներկայացնում է տարածաշրջանում տնտեսական և տրանսպորտային կապերի բացումը, ինչը կօգնի տարածաշրջանի բոլոր երկրներին: Այդ պատճառով ես այսօր ուրախությամբ և հպարտությամբ եմ ստորագրում այս փաստաթուղթը և ուզում եմ շնորհավորել Ադրբեջանի ողջ բնակչությանը այս պատմական իրադարձության կապակցությամբ»,- հայտարարել է Ալիևը: