Համոզված եմ, որ մեր հարևան երկրները ներգրավված կլինեն տրանսպորտային միջանցքների ստեղծման գործում,- այս մասին Ադրբեջանի նախագահ Իլհամ Ալիևը հայտարարել է Մոսկվայում, Ռուսաստանի նախագահի և Հայաստանի վարչապետի հետ հանդիպումից հետո կայացած համատեղ մամուլի ասուլիսում:

«Տրանսպորտային հաղորդակցությունների բացումը բխում է Ադրբեջանի, Հայաստանի և Ռուսաստանի շահերից: Ինչպես նաև մեր հարևան պետությունների շահերից: Համոզված եմ, որ մեր հարևան երկրները նույնպես ակտիվորեն մասնակցելու են տրանսպորտային միջանցքների ստեղծմանը և տրանսպորտային զարկերակների ստեղծմանը մեր տարածաշրջանում: Մենք պետք է շարունակենք ձգտել գտնել ոլորտներ, որոնք մեզ արագ արդյունք կտան և կկենտրոնանան արդյունքների վրա», – ասել է Ալիևը:

Նրա խոսքով, 2020 թվականի նոյեմբերի 9-ին ստորագրված համաձայնագրի կետերի մեծ մասն արդեն կատարվել են: Իլհամ Ալիևի խոսքով, Կրեմլում կայացած հանդիպումը կարևոր էր տարածաշրջանի կայուն զարգացման համար:

«Հրադադարից երկու ամիս է անցել: Այն փաստը, որ նոյեմբերի 9-ին հրադադարի համաձայնագիրը ստորագրած առաջնորդները հավաքվել են Մոսկվայում, վկայում է այն մասին, որ մենք կենտրոնացած ենք արդյունքի վրա: Սա մեզ հույս է տալիս, որ, ինչպես ժամանակին ասել է Վլադիմիր Պուտինը, Լեռնային Ղարաբաղի հակամարտությունը պետք է մնա անցյալում: Մենք պետք է մտածենք ապագայի մասին: Եկեք մտածենք, թե ինչպես միասին ապրենք»,- ասել է Ալիևը: