Դուք այս երկրի իսկական բարեկամն եք: Մենք, շնորհակալություն ենք հայտնում անձամբ Ձեզ և ԱՄՆ-ին մեր ռազմավարական գործընկերությանը աջակցելու համար, սա մեր ունեցած ամենակարևոր գործընկերությունն է, – այս մասին ԱՄՆ-ի պետքարտուղար Մայք Փոմփեոյի հետ հանդիպման ժամանակ հայտարարել է Վրաստանի վարչապետ Գիորգի Գախարիան:
Կառավարության ղեկավարն ընդգծել է ԱՄՆ-Վրաստան ռազմավարական գործընկերությունը և շնորհակալություն հայտնել ԱՄՆ պետքարտուղարին գլոբալ համաճարակի ընթացքում Վրաստան կատարած այցի համար:
«Իհարկե, շնորհակալ ենք Միացյալ Նահանգներին՝ աջակցելու համար նոր կորոնավիրուսի դեմ պայքարում: Ինչպես քաջատեղյակ եք, մենք ունենք շատ արդյունավետ համագործակցություն՝ Լուգարի լաբորատորիայի տեսքով, ինչը հանգուցային կողմ է նոր կորոնավիրուսի դեմ պայքարում: Նախ ցանկանում եմ ընդգծել, որ մենք իսկապես գնահատում ենք Միացյալ Նահանգների ժողովրդի և կառավարության շարունակական աջակցությունը Վրաստանի տարածքային ամբողջականությանը և ինքնիշխանությանը: Դուք շատ լավ գիտեք, թե որքան կարևոր է այս հարցը մեր երկրի համար, որի տարածքները բռնազավթված են, քանի որ գրավող ուժերը դեռ տեղակայված են մեր հողի վրա: Մենք գիտենք, որ այս ռազմավարական գործընկերությունը առաջին հերթին հիմնված է արժեքների վրա – ազատություն, ժողովրդավարություն և, իհարկե, ընդհանուր աշխարհառազմավարական շահեր: Տարածաշրջանի այս շատ փոփոխվող ժամանակաշրջանում մենք գիտակցում ենք, որ այդ խնդիրները պետք է լուծվեն: Մենք շատ լավ հնարավորություն ունենք քննարկելու կարևոր հարցեր, խորացնելու Միացյալ Նահանգների և Վրաստանի համագործակցությունը պաշտպանության և անվտանգության, տնտեսական և ժողովրդավարական համախմբման հարցերում: Ես ուզում եմ հավաստիացնել ձեզ, որ մենք իսկապես զգում ենք, որ եկել է պահը մեր համագործակցության և գործընկերության ամրապնդման, ինչպես նաև այս տարածաշրջանում Միացյալ Նահանգների ուժեղացված ներկայացուցչության: Կրկին բարի գալուստ և շնորհակալություն Վրաստան կատարած այցի համար», – դիմել է Գիորգի Գախարիան Մայք Փոմփեոյին:
ԱՄՆ պետքարտուղարը շնորհակալություն է հայտնել Վրաստանի կառավարության ղեկավարին հյուրընկալության համար: Մայք Փոմփեոն կարևորել է երկու երկրների երկարամյա բարեկամական հարաբերությունները:
«Պարոն վարչապետ, շատ ուրախ եմ, որ այստեղ եմ: Քննարկվելու են շատ կարևոր հարցեր, և ըստ այդմ նշվել են Ձեր թվարկած բոլոր ասպեկտները: Ամբողջ աշխարհը, ներառյալ Վրաստանը, կանգնած է Չինաստանից ներթափանցած վարակի մարտահրավերի առջև: Մենք միասին կզբաղվենք դրանով, հոգ կտանենք մեր ժողովրդի մասին և կզարգացնենք տնտեսությունը, ինչը շատ կարևոր է ձեր երկրի, տարածաշրջանի և աշխարհի բարեկեցության համար: Մենք 30 տարի շարունակ հիանալի ընկերներ ենք եղել: Մենք աջակցում ենք ձեզ ժողովրդավարական հարցերում և միասին աշխատում ենք ձեր երկրի բռնազավթումից ելնելով ցավի և դժվարությունների հետ կապված հարցերի շուրջ: Ապագայում մենք ամեն ինչ անելու ենք ձեր երկրում ժողովրդավարացման գործընթացին աջակցելու, ազատ և արդար ընտրությունների համար կարևոր ինստիտուտները ամրապնդելու և այն ամենի համար, ինչը բխում է առողջ քննարկումներից և ժողովրդավարությունից: Շնորհակալություն հյուրընկալության համար: Ես գնահատում եմ այս հնարավորությունը և ուրախ եմ հանդիպել Ձեզ», – նշել է Մայք Փոմփեոն:
Կողմերը քննարկել են Վրաստան-ԱՄՆ ռազմավարական գործընկերության հիմնական ուղղությունները և երկրների միջև ամուր համագործակցության հետագա խորացման հեռանկարները:
Վարչապետը նշել է ԱՄՆ-ի նշանակալի օժանդակությունը համավարակի դեմ պայքարում և շնորհակալություն է հայտնել ռազմավարական գործընկեր պետությանը: Ուշադրություն է դարձվել Վրաստանի և տարածաշրջանի անվտանգության միջավայրին և տարածաշրջանային և միջազգային անվտանգության ամրապնդման ուղղությամբ Վրաստանի և ԱՄՆ-ի համագործակցությանը:
Պետքարտուղարի հետ հանդիպման ժամանակ կառավարության ղեկավարը շեշտը դրել է Վրաստանի բռնազավթված շրջաններում անվտանգության ու հումանիտար բարդ իրավիճակի վրա:
Պետքարտուղարը վերահաստատել է Միացյալ Նահանգների անսասան աջակցությունը Վրաստանի ինքնիշխանությանը և տարածքային ամբողջականությանը, ինչպես նաև երկրի եվրոպական և եվրաատլանտյան ինտեգրմանը:
Հանդիպման ընթացքում կարևորվել է համագործակցությունը առևտրատնտեսական հարաբերությունների հետագա ամրապնդման և երկրի ժողովրդավարական զարգացման ուղղությամբ:
Վարչապետը մասնավորապես շեշտել է Միացյալ Նահանգների կարևոր դերը երկրի ժողովրդավարական զարգացման ճանապարհին:
Ըստ Գիորգի Գախարիայի, պետքարտուղարի այցը ևս մեկ անգամ ընդգծում է Վրաստան-ԱՄՆ ռազմավարական գործընկերության ուժը և երկու երկրների պատրաստակամությունը՝ ամրապնդելու համագործակցությունը, ընդհանուր արժեքների հիման վրա գործընկերությունն էլ ավելի ամրապնդելու համար:
Կառավարության վարչությունում ընդլայնված ձևով բարձր մակարդակի հանդիպում է անցկացվել, ԱՄՆ-ի կողմից մասնակցել են – Եվրոպայի և Եվրասիայի հարցերով պետքարտուղարի տեղակալ Ֆիլիպ Ռիկերը, Վրաստանում ԱՄՆ դեսպան Քելլի Դեգնանը, վրացական կողմից՝ արտաքին գործերի նախարար Դավիթ Զալկալիանին, Ամերիկայի Միացյալ Նահանգներում Վրաստանի արտակարգ և լիազոր դեսպան Դավիթ Բաքրաձեն և կառավարության վարչության ղեկավար Նաթիա Մեզվրիշվիլին:
