Վրաստանի ֆինանսների նախարար Իվանե Մաճավարիանին հանդիպել է Վրաստանում Ավստրիայի նորանշանակ արտակարգ և լիազոր դեսպան Թոմաս Մյուլմանին:

Նախարարության մամուլի ծառայության հաղորդմամբ, ճանաչողական հանդիպման ընթացքում կողմերը քննարկել են երկկողմ հարաբերությունները, ներառյալ առևտրատնտեսական ոլորտում առկա իրավիճակը և համագործակցության հետագա հեռանկարները:

«Ֆինանսների նախարարը հյուրին ներկայացրել է երկրում առկա մակրոտնտեսական իրավիճակը, համավարակի դեմ պայքարի ընթացիկ ֆինանսական ռեսուրսները, ներառյալ դոնորների կողմից հատկացված միջոցների մոբիլիզացումը:

Իվանե Մաճավարիանին շնորհակալություն է հայտնել հյուրին այն աջակցության համար, որը Ավստրիան երկար տարիներ ցուցաբերում է Վրաստանի էներգետիկայի, շրջակա միջավայրի, զբոսաշրջության, գյուղատնտեսության, կրթության և մշակույթի խթանման գործում: Վրաստանը և Ավստրիայի Հանրապետությունը համաձայնագրեր են կնքել էկոնոմիկայի, օդային տրանսպորտի, ներդրումների խթանման և պաշտպանության, եկամտի և կապիտալի կրկնակի հարկումը բացառելու և այլ ոլորտներում:

Ինչպես նշվել է հանդիպմանը, վրաց-ավստրիական տնտեսական համագործակցությունը դինամիկ զարգանում է, և աճում է ավստրիական ընկերությունների հետաքրքրությունը Վրաստանի տնտեսական և ներդրումային ներուժի նկատմամբ:

Իր հերթին, Ավստրիայի դեսպանը վերահաստատել է Վրաստանի հետ գործընկերության կարևորությունը և նշել, որ Ավստրիան կշարունակի աջակցել երկրի համար գերակա ոլորտներին:

Հանդիպման ավարտին կողմերը հույս են հայտնել, որ չնայած համաշխարհային համաճարակին ՝ երկու երկրները կկարողանան խորացնել համագործակցությունը և խթանել գործարար կապերը», – ասվում է Վրաստանի ֆինանսների նախարարության տեղեկության մեջ: