Քանի նախարարություն կմնա Վրաստանի կառավարությունում, այս մասին դեռևս որոշում կայացված չէ,- նշվածի կապակցությամբ հայտարարել է խորհրդարանի առողջապահության կոմիտեի նախագահ Ակակի Զոիձեն՝ «Վրացական երազանք»-ի գրասենյակում անցկացված խորհրդակցությունների ավարտից հետո:

Նրա մեկնաբանմամբ, քննարկվում է վարչապետ Մամուկա Բախտաձեի առաջարկը՝ նախարարությունների քանակը 14-ից 11-ը հասցնելու մասին, սակայն գաղափարը դեռևս քննարկման ընթացքում է:

«Հավաստիացնում եմ, վերջնական որոշում կայացված չէ: Առաջարկ կա այս ուղղությամբ, սակայն առաջարկը դեռևս չի նշանակում կայացված որոշում»,- մեկնաբանել է Ակակի Զոիձեն:

Պատգամավորը հաստատել է, որ կառավարող թիմը քննարկում է պատժակատարողության և արդարադատության, մշակույթի և կրթության, փախստականների և առողջապահության նախարարությունների միավորման հարցը: Սակայն առողջապահության կոմիտեի նախագահը չի բացառում, որ փոփոխությունները վերաբերեն նաև այլ նախարարություններին:

Կառավարությունում նախատեսված վերակազմակերպման մասին «Վրացական երազանք»-ի գրասենյակում անցկացել են խորհրդակցություններ: Նշված հարցով խորհրդակցություններ կանցկացվեն նաև վաղը: