20 ամյա վեճից հետո, Գերմանիան Պերուին է վերադարձրել հնագույն ոսկե դիմակը
13:26, 07.09.2018
20 ամյա իրավական և դիվանագիտական վեճից հետո, Գերմանիան Պերուին է վերադարձրել հնագույն ոսկե դիմակը: Լրատվությունն այս մասին հաստատել է Պերուի մշակույթի նախարարը:
Դիմակը պատկանում է նախակոլումբյան ժամանակաշրջանին: Պերուն 8-րդ դարի ոսկե դիմակի անհետացման մասին հայտարարել է 1999 թվականին, որից հետո հնագույն իրը ինտերպոլը հայտնաբերել է Գերմանիայի Վիսբադեն քաղաքում:
Դիմակը Բեռլինում Պերուի դեսպանությանը փոխանցել է Բավարիայի կառավարությունը: Մյունհենի շրջանային դատարանը Պերուին դիմակը վերադարձնելու որոշումը ընդունել էր 2016 թվականին: Դիմակը Պերու են տանելու մոտ օրերս:
Հատկանշական է, որ Պերուի հարևան Էկվադորը վերջերս Գերմանիայից ստացել է նախակոլումբյան ժամանակաշրջանի 13 հնագույն իր:
