Жозеп Боррель – Евроеидгыла, Америкеи НАТОи ирхьыҧшымкәа, ахатә арбџьармчқәа рыргылара алшара амазароуп

Евроеидгыла адәныҟаполитикатә усбарҭа анапхгаҩы иҳәамҭала, Евроеидгыла, Америкеи НАТОи ирхьыҧшымкәа, ахатә арбџьармчқәа рыргылара алшара амазароуп. Жозеп Боррель ари аҳәамҭа ҟаиҵеит Америка Ауаажәларратә дырраҭара амаҵзура аинтервиу анеиҭоз.

«Ҳара, европауаа, аҭакҧхықәра ҳхы иадҵаны, иаҭаххар, америкауаа ишыҟарҵо еиҧшҵәҟьа, ҳхатә арбџьармчқәа рыргылара алшара ҳамазароуп. Ҳрегион аҿы апроблемақәа цәырҵыр, ҳара америкауаа рҽалагалара ҳҭымхароуп, аӡәгьы ҳиҧшымкәа, ҳхала уи ҟаҳҵаратәы алшара ҳамазароуп», — иҳәеит Боррель.

Иара убас, Боррель ишазгәеиҭаз ала, атрансатлантикатә аимадарақәа рырҧсыҽра иахәҭам, избанзар, Боррель игәаанагарала,  «Мрагылара ҕашақә иазныҟәо»  амчқәа уи рхы иадырхәар рылшоит. .

«Европа шаҟа иҕәҕәахо аҟара НАТОгьы иҕәҕәазаауеит, избанзар ҳаргьы алианс ҳалоуп.  Европа арратә алшарақәа  НАТО арҕәҕәара иацхраауеит», — иазгәеиҭеит Боррель.