Қырҭтәыла Аҧыза-министр Иракли Ҕарибашвили, Бриуссель ивизит аҳәаақәа ирҭагӡаны, Европатәи агәыларатә политикеи арҭбаареи азҵаарақәа рзы Еврокомиссар Оливер Варҳеи диҧылеит.

Еврокомиссиаҿы имҩаҧгаз ишиашоу аиҧылараҿы хшыҩзышьҭра рызун европатәи евроатлантикатәи интеграциа апроцесс аҿы Қырҭтәыла апрогресси, ассоциациа аиқәшаҳаҭра аҳәаақәа ирҭагӡаны имҩаҧгаз ареформақәеи. Иаҵшьны иазгәаҭан Евроеидгылаҟны иаҳа иҕәҕәоу аекономикатәи асектортәи интеграциа аҵакы.

Аҧыза-министр ишазгәеиҭаз ала, аиҳабыра амбициатә план рымоуп, 2024 шықәсазы Қырҭтәыла, Евроеидгыла алаларазы аофициалла азыҳәамҭа ҟанаҵароуп, абри ахықәкы анагӡаразы, аиҳабыра, аполитикатәи аекономикатәи реформақәа рымҩаҧгара нарыгӡоит.

Ишиашоу аформат аҿы имҩаҧгаз аиҧылара аамышьҭахь, аганқәа рхаҭарнакцәа ирҭбаау аформат аҿы еицәажәеит. Аганқәа рхаҭарнакцәа COVID-19 апандемиа иахылҵыз апроблемақәеи аҳасабтәқәеи ирылацәажәеит. Қырҭтәыла аиҳабыра рнапхгаҩы иаҵшьны иазгәеиҭеит апандемиа иахылҵыз асоциал-економикатә проблемақәа рыӡбара апроцесс аҿы Евроеидгыла аҟынтә атәыла иаиуз ацхыраара. Ҷыдала иазгәаҭан апандемиа аҵархара апроцесс аҿы авакцинациа инанагӡо ароль дуи, атәылақәа зегьы авакцина ахархәаразы еиҟараны алшарақәа рзеиқәыршәара ахымҧадареи.

Аҧыза-министри Еврокомиссари Қырҭтәыла имҩаҧысуа аполитикатә процессқәагьы ирылацәажәеит. Иракли Ҕарибашвили ишиҳәаз ала, аиҳабыра, алҵшәа зхылҵша адиалог амҩаҧгара иазхиоуп, уи апроцессқәа зегьы конструктивла рымҩаҧгареи адеескалациеи иацхраауеит. Аиҳабыра рнапхгаҩы иаҵшьын иазгәеиҭеит ари апроцесс аҿы Евроеидгылара аҽазышәареи Европатәи Ахеилак ахада Шарль Мишели ихатә хаҭарнак Кристиан Даниельсони адиалог апроцесс аҿы рылахәызаара аҵаки. Аиҳабыра рнапхгаҩы ишиҳәаз ала, абри афакт даҽазнык аанарҧшуеит Қырҭтәыла Евроеидгылазы ҵакыс иамоу.

Иара убас, аиҧылараҿы ирзааҭгылеит арегион аҿы имҩаҧысуа апроцессқәеи, Қырҭтәыла импыҵахалоу аҵакырадгьылқәа рҿы агуманитартә ҭагылазаашьа цәгьеи, аимакқәа рҭыҧқәҵара ахырхарҭала аиҳабыра имҩаҧырго аҭынчратә политикеи. Аиҧылараҿы даҽазнык иаҵшьны иазгәаҭан Евроеидгыла Қырҭтәыла ахьыҧшымреи аҵакырадгьылтә акзаареи ишадгыло.