Ԥхынгәы 1 инаркны Евроеидгыла атерриториеи Шегнегтәи азонеи рҿы ацифратә ковидсертификатқәа аларгалеит. Аковидсертификатқәа хықәкыс ирымоуп апандемиаан аныҟәара армариара. Ари аанацҳаит “Доиче велле”.

Амч роуеит хсертификатк: акоронавирус азы алаҵа аҟаҵара шьақәзырӷәӷәо, атест азы асертификати, акоронавирус зхызгахьаз ауаа рзы асертификати.

Акоронавирус зхызгахьаз ауааԥсыра асертификат аиура рылшоит “PCR” атест ала ачымазара ашьақәырӷәӷәара 11 мшы рышьҭахь. Уи амч амоуп 180 мш ирылагӡаны.

Асертификатқәа амч рымоуп Евроеидгыла иалоу 27 тәылақәеи Исландиеи, Лихтенштеини, Норвегиеи, Швеицариеи рҿы.

Асертификатқәа роуеит “Бионтек/Фаизер”, “Модерна”, Астразенека”, “Џьонсони Џьонсони” алаҵақәа ззыҟарҵахьаз ауааԥсыра. Иара убас асертификатқәа рырҭар ҟалап “Астразенека қовидшилди”,”Синофарми”, “Синофаки” ззыҟарҵахьаз ауааԥсырагьы.