Ниу-Иорк, ЕАР Ассамблеиа хада  75-тәи асессиаҿы, Қырҭтәылеи 57 ҳәынҭқарреи ицәырыргаз  «Аҧсни Аахыҵ Уаҧстәылеи рҟынтә мчыла ииагоу ауааҧсыра рстатус иазку» арезолиуциа рыдыркылеит. Сынтәа арезолиуциа иадгылеит 80 ҳәынҭқарра. Ари аинформациа аланарҵәеит Қырҭтәыла иҟоу ЕАР еснагьтәи ахаҭарнакра.

Қырҭтәыла ЕАР Ассамблеиа хада ашҟа ари арезолиуциа аланагалоит 2008 шықәса инаркны. Арезолиуциаҿы Қырҭтәыла импыҵахалоу аҵакырадгьылқәа рҿы мчыла имҩаҧгоу адемографиатә аиҭакрақәа ирықәыӡбоит,  Аҧсни Аахыҵ Уаҧстәылеи рҟынтә  мчыла ииагоу ауааҧсыра аҩныҟа рыхынҳәразы рзин шьақәдырҕәҕәоит.

Агуманитартә контекс адагьы,  арезолиуциа  апрактикатә ҵакы амоуп, избанзар ЕАР амаӡаныҟәгаҩ хада иднаҵоит Қырҭтәыла иқәынхо мчыла ииагоу ауааҧсыра рҭагылазаашьа иазкны есышықәсатәи аҳасабырба армазеира.

Арезолиуциаҿы Женеватәи аиҿцәажәарақәа рылахәылацәа рахь ааҧхьара ҟаҵоуп Қырҭтәыла импыҵахалоу аҵакырадгьылқәа рҿы ашәарҭадареи ауаҩытәыҩса изинқәеи рзы аҭагылазаашьа аиҕьтәразы аҽазышәара дырҕәҕәарц,  адокумент ишану ала, уи ахҵәацәа аҩныҟа рырхынҳәра апроцесс иацхраауеит.