Аҭыҧантәи ахаланапхгаратә алхрақәа аҩбатәи атур ибзианы имҩаҧысит, аха,  уажәгьы инагӡо аполиаризациеи  уи иадҳәалоу ариторика цәгьеи апроцесс азы анырра рыман, — иҳәеит Аусеицуреи Ашәарҭадареи рзы Европатәи Аиҿкаара анаҧшратә миссиа анапхгаҩы  Альберт Джонсон.

«Аҭыҧантәи ахаланапхгаратә алхрақәа аҩбатәи атур ибзианы еиҿкаан, аконкуренциа еиқәыршәан, акампаниа атәыла зехьынџьара имҩаҧган . Акандидатцәа акампаниа амҩаҧгара алшара рыман,  аха,  аоппонентцәа дара -дара ауаа рыршәареи рықәыҕәҕәареи рхарарҵон. Анапхгаратә партиа аҧыжәара шамаз убарҭан. Хазхаҭалатәи ателеканалқәа,  ҧасеиҧш,  иаартны позициак иадгылон», — иҳәеит Джонсон.

Иара иажәақәа рыла алхрақәа рымш ибзианы еиҿкаан,  ҭынч имҩаҧысит.

«Инеизакны иуҳәозар,  абжьыҭиреи абыжьқәа рыҧхьаӡареи апроцесс ахәшьара бзиа аиуит,  аха, апроцедуратә проблемақәак иҟан.  Ҳзыргәамҵуа факткгьы иҟоуп, лассы-лассы анаҧшратә аиҿкаарақәа апартиақәа рыдгылаҩцәас иқәгылон,  алхырҭақәа рынҭыҵ алхыҩцәа рзы анырра рҽазыркәан», — иҳәеит Альберт Джонсон.

Аамҭакала, иара ишазгәеиҭаз ала, Аусеицуреи Ашәарҭадареи рзы Европатәи Аиҿкаареи Венециатәи акомиссиеи рыбжьагарақәа нагӡамызт.